|
សូមគោរព ឯកឧត្ដមអ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈកម្មាធិការអន្តរនាយកដ្ឋានប្រយុទ្ធនឹងជម្ងឺអេដស៍និងគ្រឿងញៀន សូមគោរពលោក លោកស្រី សមាជិក សមាជិកា នៃអង្គប្រជុំទាំងមូលជាទីមេត្រី ! ជាបឋមខ្ញុំមានកិត្តិយសសូមថ្លែងអំណរគុណយ៉ាងជ្រាលជ្រៅចំពោះ ឯកឧត្ដម អ៊ឹម សិទ្ធី រដ្ឋមន្រ្តីក្រសួងអប់រំ យុវជន និងកីឡានិងជាប្រធានគណៈកម្មាធិការអន្តរនាយកដ្ឋានប្រយុទ្ធនឹងជម្ងឺអេដស៍ និងគ្រឿងញៀន ដែលបានឆ្លៀតពេលវេលាដ៏មានតម្លៃក្នុងការចូលរួមកិច្ចប្រជុំប្រចាំឆ្នាំរបស់គណៈកម្មាធិការអន្តរនាយកដ្ឋានប្រយុទ្ធនឹងជម្ងឺអេដស៍ និងគ្រឿងញៀននាថ្ងៃនេះ។ ជាមួយគ្នានេះ ខ្ញុំសូមថ្លែងអំណរគុណចំពោះវត្តមានរបស់ឯកឧត្ដម លោកជំទាវគណៈអធិបតី លោក លោកស្រី ភ្ញៀវកិត្តិយស និងអ្នកចូលរួមទាំងអស់ ដែលបានអញ្ជើញចូលរួមកិច្ចប្រជុំដ៏មានសារសំខាន់នាពេលនេះទោះបីជាមានភាពមមាញឹកក្នុងការងារនៅមុនដំណាច់ឆ្នាំ២០១២និងត្រៀមលក្ខណៈអបអរសាទរឆ្នាំថ្មី ២០១៣ដែលនឹងឈានមកដល់នាពេល៥ថ្ងៃខាងមុខ ។ ខ្ញុំសូមគោរពអនុញ្ញាតជម្រាបជូនឯកឧត្តមលោកជំទាវ លោក លោកស្រី ជ្រាបថា កិច្ចប្រជុំ នាថ្ងៃនេះមានអ្នកចូលរួមសរុបប្រមាណ ១០០ នាក់ក្នុងនោះមានថ្នាក់ដឹកនាំនិងមន្ត្រីនៃគណៈកម្មាធិការICHAD តំណាងអាជ្ញាធរជាតិប្រយុទ្ធនឹងជម្ងឺអេដស៍តំណាងអាជ្ញាធរជាតិប្រយុទ្ធប្រឆាំងគ្រឿងញៀនតំណាងក្រសួងមហាផ្ទៃតំណាងក្រសួងកិច្ចការនារីតំណាងក្រសួងសង្គមកិច្ចនិងអតីតយុទ្ធជនតំណាងក្រសួងធម្មការនិងសាសនាតំណាងក្រសួងអភិវឌ្ឍន៍ជនបទតំណាងក្រសួងសុខាភិបាលតំណាងកាកបាទក្រហមកម្ពុជាតំណាងអង្គការសហប្រជាជាតិប្រចាំកម្ពុជាដូចជា UNFPA, UNESCO, UNICEF, UNAIDS, WFP និងតំណាងអង្គការសង្គមស៊ីវិលដូចជា Plan International, RHAC, Mith Samlanh, KHANA, World Vision, Medicam, Maristop, Inthanou និងអង្គការដំរី ។ កិច្ចប្រជុំនេះមានគោលបំណងចែករំលែកលទ្ធផលសម្រេចបានលើប្រធានបទការអប់រំបំណិនជីវិត ស្ដីពីការយល់ដឹងពីមេរោគអេដស៍ជម្ងឺអេដស៍និងគ្រឿងញៀនដោយរួមបញ្ឆួលទាំងចំណេះដឹងពីសុខភាពបន្តពូជនិងសុខភាពផ្លូវភេទដែលបានអនុវត្តក្នុងឆ្នាំ ២០១២ និងលើកទិសដៅអនុវត្តសម្រាប់ឆ្នាំ ២០១៣ ខាងមុខ។ ឆ្លៀតឱកាសនេះខ្ញុំសូមគោរពអនុញ្ញាតឯកឧត្ដមគណៈអធិបតីអង្គពិធីទាំងមូលមេត្តាជ្រាបថាគណៈកម្មាធិការអន្តរនាយកដ្ឋានប្រយុទ្ធនឹងជម្ងឺអេដស៍និងគ្រឿងញៀនតែងតែរៀបចំកិច្ចប្រជុំប្រចាំឆ្នាំរបស់ខ្លួនជារៀងរាល់ឆ្នាំចាប់តាំងពីឆ្នាំ១៩៩៩មកហើយកិច្ចប្រជុំថ្ងៃនេះជាកិច្ចប្រជុំប្រចាំឆ្នាំលើកទី ១៣ ។ សូមរំលឹកដែរថាគណៈកម្មាធិការនេះត្រូវបានបង្កើតឡើងតាំងពីឆ្នាំ ១៩៩៩ ដែលកាលនោះមានឈ្មោះថា "គណៈកម្មាធិការអន្តរនាយកដ្ឋានប្រយុទ្ធនឹងមេរោគអេដស៍/ជម្ងឺអេដស៍" ហៅកាត់ថា ICHA (Inter departmental Committee for HIV/AIDS) ដែលមាន ១៥ អង្គភាពពាក់ព័ន្ធចំណុះទីស្ដីការក្រសួងអប់រំយុវជន និងកីឡាជាសមាជិក។ នៅឆ្នាំ ២០១០ គណៈកម្មាធិការនេះបានពង្រីកតួនាទីរបស់ខ្លួនដោយមានឈ្មោះថា "គណៈកម្មាធិការអន្តរនាយកដ្ឋានប្រយុទ្ធនឹងជម្ងឺអេដស៍និងគ្រឿងញៀន" ហៅកាត់ថាICHAD (Inter departmental Committee for AIDS and Drugs)។ គណៈកម្មាធិការ ICHA និងគណៈកម្មាធិការICHAD សុទ្ធតែដឹកនាំដោយ ឯកឧត្តម អ៊ឹម សិទ្ធី ផ្ទាល់ចាប់តាំងពីការកកើតនៅឆ្នាំ១៩៩៩ រហូតដល់បច្ចុប្បន្ន។ តាមរយៈការដឹកនាំប្រកបដោយទស្សនវិស័យច្បាស់លាស់ភាពស្វាហាប់និងការប្ដេជ្ញាចិត្តខ្ពស់របស់ឯកឧត្ដមរដ្ឋមន្ត្រីព្រមទាំងមានការគាំទ្របច្ចេកទេសនិងថវិកាពីគ្រប់ដៃគូអភិវឌ្ឍនានា (UNFPA, UNICEF, UNESCO, DFID/UK, WFP, Global Fund ATM, UNDP ។ល។ ) គណៈកម្មាធិការ ICHAD បានទទួលជោគជ័យនូវសមិទ្ធិផលជាច្រើនដូចជា ៖
- នៅតាមសាលាបឋមសិក្សានិងមធ្យមសិក្សាលើមុខវិជ្ជាសិក្សាសង្គម - នៅតាមគ្រឹះស្ថានបណ្ដុះបណ្ដាលគ្រូលើមុខវិជ្ជាអប់រំសុខភាព - នៅតាមថ្នាក់អក្ខរកម្មនិងមជ្ឈមណ្ឌលសិក្សាសហគមន៍
- នៅតាមឃុំសង្កាត់តាមរយៈក្រុមប្រឹក្សាយុវជន - នៅក្នុងឱកាសនៃការបោះជំរំយុវជន - និងតាមរយៈកម្មវិធីមិត្តអប់រំមិត្តក្រុមប្រឹក្សាយុវជនយុវជនកាកបាទក្រហមនិងយុវជនកាយរឹទ្ធិ
ឯកឧត្ដម លោកជំទាវ លោក លោកស្រី អង្គប្រជុំទាំងមូលជាទីមេត្រី ! ក្នុងឱកាសដ៏មហាប្រសើរនេះ ខ្ញុំមានកិត្តិយសសូមគោរពរាយការណ៍ពីសមិទ្ធិផលសំខាន់ៗដែលគណៈកម្មាធិការ ICHAD សម្រេចបានក្នុងឆ្នាំ ២០១២ ដូចតទៅ ៖
ឯកឧត្ដមលោកជំទាវ លោក លោកស្រី និងអង្គប្រជុំទាំងមូលជាទីគោរព ! ទាំងអស់នេះគឺជារបាយការណ៍សង្ខេបស្ដីពីការអនុវត្តសកម្មភាពប្រចាំឆ្នាំ ២០១២ ដោយផ្អែកតាមផែនការប្រតិបត្តិដែលបានកំណត់កន្លងមក។សរុបសេចក្ដីមកលទ្ធផលវិជ្ជមានដែល យើងសម្រេចបាននាពេលនេះ គឺអាស្រ័យដោយមានការដឹកនាំនិងគាំទ្រពីថ្នាក់ដឹកនាំក្រសួងគ្រប់លំដាប់ថ្នាក់ ពិសេសឯកឧត្ដមរដ្ឋមន្ត្រី ដែលតែងតែផ្ដល់ឱកាសនិងបង្ក ភាពងាយស្រួល ធ្វើឱ្យនាយកដ្ឋានជំនាញ បានអនុវត្តសកម្មភាពរបស់ខ្លួនបានទាន់ពេលវេលាតាមចំណុចដៅ ដែលបានកំណត់ក្នុងផែនការប្រតិបត្តិប្រចាំ ឆ្នាំ ។ ម៉្យាងវិញទៀត នេះក៏ដោយសារមានការសហការ និងទំនាក់ទំនងល្អពីស្ថាប័នពាក់ព័ន្ធ អាជ្ញាធរដែនដី ព្រមទាំងដៃគូអភិវឌ្ឍន៍ជាតិ អន្តរជាតិ ដូចជា UNFPA, UNESCO, UNICEF, Global Fund ATM, អង្គការ RHAC, អង្គការ Inthanou និងអង្គការដៃគូផ្សេងៗទៀតដែលមិនបានរៀបរាប់អស់ ។ មុននឹងបញ្ចប់ ខ្ញុំបាទសូមអនុញ្ញាតឆ្លៀតឱកាសដ៏មហាប្រសើរនេះថ្លែងអំណរគុណ ចំពោះ ការចូលរួមរបស់ដៃគូអភិវឌ្ឍន៍ទាំងអស់ដែលបានគាំទ្រទាំងបច្ចេកទេសនិងហិរញ្ញវត្ថុដល់គ្រប់សកម្មភាពរបស់ក្រសួងក្នុងការលើកកម្ពស់សុខភាពកុមារនិងយុវវ័យទាំងក្នុងនិងក្រៅសាលារៀននិងសូមអរគុណជាពិសេសចំពោះអង្គការUNFPA ដែលបានឧបត្ថម្ភគាំទ្រកិច្ចប្រជុំនេះ។ សូមគោរពជូនពរ ឯកឧត្ដម លោកជំទាវ គណៈអធិបតី និងអង្គពិធីទាំងមូល សូមជួបប្រទះតែនឹងពុទ្ធពរទាំង៤ ប្រការគឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
|
