|
នៅព្រឹកថ្ងៃទី៤ ខែឧសភា ឆ្នាំ២០១៣ នៅឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង បានរៀបចំព្រះរាជពិធីសម្ពោធ វិទ្យាល័យចំណេះទូទៅ និងបច្ចេកទេស ព្រះបាទសម្ដេចព្រះបរមនាថ នរោត្ដម សីហមុនី ក្រោមព្រះរាជាធិបតីភាពដ៏ខ្ពង់ខ្ពស់បំផុត ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងមានការអញ្ជើញចូលរួមពីសមាជិកព្រឹទ្ធសភា រដ្ឋសភារាជរដ្ឋាភិបាលកម្ពុជា ថ្នាក់ដឹកនាំមកពីស្ថាប័នពាក់ព័ន្ធ មន្ត្រីអប់រំ យុវជន និងកីឡាគ្រប់លំដាប់ថ្នាក់ លោកគ្រូ-អ្នកគ្រូ សិស្សានុសិស្ស ក្រុមកាយរឹទ្ធិ ក្រុមយុវជនកាកបាទក្រហមកម្ពុជា និងប្រជាពលរដ្ឋ សរុបប្រមាណ ១ ម៉ឺននាក់ ។
វិទ្យាល័យចំណេះទូទៅ និងបច្ចេកទេស ព្រះបាទសម្ដេចព្រះបរមនាថ នរោត្ដម សីហមុនី ថ្មីត្រូវបានសាងសង់នៅលើផ្ទៃដី ១៣ ហិតា និង ៧៤ អា ជាព្រះរាជអំណោយដ៏ថ្លៃថ្លារបស់ ព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដ៏ខ្ពង់ខ្ពស់បំផុត។ អគារសិក្សាដែលបានសាងសង់រួច មានចំនួន ៥ ខ្នង មាន ៦៩ បន្ទប់ ក្នុងនោះចែកជាអគារសិក្សាចំនួន ៤ខ្នង មាន ៤៩បន្ទប់ និងអគាររដ្ឋបាល ១ ខ្នង មាន ២០ បន្ទប់ ហើយបន្ទប់រៀននីមួយៗ ត្រូវបានបំពាក់ដោយ តុគ្រូ ១ កៅអីគ្រូ ១ ក្ដារខៀន ២ តុកៅអីសិស្សចំនួន ២០ អំពូល ៩ និងកង្ហារ ៤ ។ ជាមួយគ្នានេះដែរ អគារដែលបានសាងសង់រួចនេះ មានបន្ទប់កុំព្យូទ័រចំនួន ២ បន្ទប់ កុំព្យូទ័រចំនួន ៥០ ព្រីនធ័រចំនួន ១២ និង LCD Projector ចំនួន ២ សម្រាប់សិស្សរៀន បណ្ណាល័យ ៣បន្ទប់ មានសៀវភៅសម្រាប់សិស្សអាន ហើយបន្ទប់ទាំងនេះបានភ្ជាប់ដោយចរន្តអគ្គិសនី និងអាងទឹកចំណុះ ២០ ម៉ែត្រគូប ដែលតជាប្រព័ន្ធចែកទឹកសម្រាប់បម្រើការនៅក្នុងសាលារៀន សួនដាំស្មៅចំនួន ១៤ កន្លែង សម្រាប់ដាំដើមឈើ និងដើមផ្កា។
ក្នុងឆ្នាំសិក្សា ២០១២-២០១៣ នេះ វិទ្យាល័យចំណេះទូទៅ និងបច្ចេកទេស ព្រះបាទសម្ដេចព្រះបរមនាថ នរោត្ដម សីហមុនី នឹងទទួលសិស្សឲ្យចូលរៀន ៖
-ផ្នែកមធ្យមសិក្សាបឋមភូមិ ថ្នាក់ទី ៧ មាន ៥ ថ្នាក់ សិស្សចំនួន ២៣២ នាក់ ស្រី ១២៣ នាក់។ ថ្នាក់ទី ៨ មាន ៤ ថ្នាក់ សិស្សចំនួន ១៩៥ នាក់ ស្រី ៩២ នាក់។ ថ្នាក់ទី ៩ មាន ៣ ថ្នាក់ សិស្សចំនួន ១៥៨ នាក់ ស្រី ៨១ នាក់។ បុគ្គលិកក្របខ័ណ្ឌមធ្យមសិក្សាបឋមភូមិមាន ៧៥នាក់ ស្រី ១៨ នាក់។
-ផ្នែកមធ្យមសិក្សាទុតិយភូមិ ថ្នាក់ទី ១០ មាន ២ថ្នាក់ សិស្សចំនួន ១១០ នាក់ ស្រី ៤២ នាក់ ។ ថ្នាក់ទី ១១ មាន ៣ ថ្នាក់ សិស្ស ១៣៨ នាក់ ស្រី ៥៨ នាក់ ។ ថ្នាក់ទី ១២ មាន ៤ថ្នាក់ សិស្ស ១៨៤ នាក់ ស្រី ៧១ នាក់។ បុគ្គលិកក្របខ័ណ្ឌមធ្យមសិក្សាទុតិយភូមិ មាន ១៣ នាក់ ស្រី ៤ នាក់។
វិទ្យាល័យចំណេះទូទៅ និងបច្ចេកទេស ព្រះបាទសម្ដេចព្រះបរមនាថ នរោត្ដម សីហមុនី គ្រោងនឹងសាងសង់អគារបន្ថែម រួមមាន៖ អគារសិក្សា ៣ ខ្នង អគារកុំព្យូទ័រ ១ ខ្នង អគារពិសោធន៍ ១ ខ្នង អគារសម្រាប់សិស្សស្នាក់នៅ ១ ខ្នង ផ្ទះសំណាក់គ្រូបង្រៀន ១ ខ្នង អគារសិល្បៈ ១ ខ្នង និងបណ្ណាល័យ១ខ្នង ។ ក្នុងនោះមានរៀបចំទីលានបាល់ទាត់ ១ កន្លែង ទីលានបាល់បោះ ១ កន្លែង អាហារដ្ឋាន ១ កន្លែង សួនបន្លែ ១ កន្លែង ស្រះចិញ្ចឹមត្រី ២ កន្លែង អណ្ដូងទឹក និងកសាងរូបសំណាកផងដែរ។
រាជធានីភ្នំពេញថ្ងៃទី៣ ខែឧសភា ឆ្នាំ២០១៣ |
