| សុន្ទរកថាស្វាគមន៍របស់ ឯកឧត្តម អ៊ឹម សិទ្ធី រដ្ឋមន្រ្តីក្រសួងអប់រំ យុវជន និងកីឡា ក្នុងពិធីជប់លៀងជូនគណៈប្រតិភូរដ្ឋមន្ត្រីក្រសួងអប់រំជប៉ុន |
|
សុន្ទរកថាស្វាគមន៍របស់ ឯកឧត្តម អ៊ឹម សិទ្ធី រដ្ឋមន្រ្តីក្រសួងអប់រំ យុវជន និងកីឡា - ឯកឧត្តម Masaharu NAKAGAWA រដ្ឋមន្រ្តី ក្រសួងអប់រំ វប្បធម៌ កីឡា វិទ្យាសាស្រ្ត និង បច្ចេកវិទ្យា នៃប្រទេសជប៉ុន និងគណៈប្រតិភូ ជាបឋមតាងនាមឲ្យក្រសួងអប់រំ យុវជន និងកីឡា នៃព្រះរាជាណាចក្រកម្ពុជា ខ្ញុំមានសេចក្ដីរីករាយនិងសូមស្វាគមន៍យ៉ាងកក់ក្ដៅ ចំពោះ ឯកឧត្ដម Masaharu NAKAGAWA រដ្ឋមន្ត្រីក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យា នៃប្រទេសជប៉ុន និងគណៈប្រតិភូ ដែលបានអញ្ជើញចូលរួមក្នុងពិធីជប់លៀងជូន ជាកិត្តិយសនាពេលល្ងាចនេះ ។ ក្នុងឱកាសនេះដែរខ្ញុំសូមថ្លែងអំណរគុណដល់ភ្ញៀវកិត្តិយសទាំងអស់ដែលបានចូលរួមក្នុងឱកាសដ៏ឧត្តុងឧត្ដមនេះ ដែលជាសក្ខីភាពនៃកិច្ចសហប្រតិបត្តិការដ៏ជិតស្និត និងជាមិត្តភាព សាមគ្គីភាព និងការយោគយល់គ្នាទៅវិញទៅមករវាងប្រទេសយើងទាំងពីរ កម្ពុជា-ជប៉ុន ឲ្យកាន់តែមានការរីកចម្រើនឡើងថែមទៀត ។ ដំណើរ ទស្សនៈកិច្ចរបស់ឯកឧត្ដមចំនួនពីរថ្ងៃនៅកម្ពុជាមានរយៈពេលខ្លីពិតមែន ប៉ុន្តែជាកិត្តិយសណាស់ ដែលឯកឧត្ដម និងគណៈប្រតិភូបានអញ្ជើញទៅទស្សនាប្រាសាទអង្គរវត្ត ប្រាសាទបាយ័ន និងបានផ្លាស់ប្ដូរបទពិសោធន៍ ព្រមទាំងការជួយឧបត្ថម្ភដល់ប្រទេសកម្ពុជាយើងខ្ញុំ ។ ក្នុងបរិបទនៃការអភិវឌ្ឍន៍ជាតិ ខ្ញុំសូមបញ្ជាក់ថា ប្រទេសកម្ពុជាធ្លាប់បានឆ្លងកាត់សង្គ្រាមសោកនាដកម្ម ដែលមិនអាចបំភ្លេចបានក្នុងរយៈពេល៣ទសវត្សកន្លងទៅ ពិសេសក្នុងរបបខ្មែរក្រហមដែលរចនាសម្ព័ន្ធសង្គម ទាំងមូលនិងធនធានមនុស្សជាច្រើនត្រូវបានបំផ្លាញស្ទើរគ្មានសល់ ។ ក្រោយពីវិនាសកម្មដ៏ជូរចត់ទាំងនេះ រាជ រដ្ឋាភិបាលកម្ពុជាក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្ដេជ្ញាធ្វើការកសាង និងអភិវឌ្ឍន៍កម្ពុជាឡើងវិញ ដោយចាត់ទុកវិស័យអប់រំជាគន្លឹះក្នុងការអភិវឌ្ឍសង្គមសេដ្ឋកិច្ច ។
-ឯកឧត្តម លោកជំទាវ ផ្អែកលើសកម្មភាពជាអាទិភាពសម្រាប់ការអភិវឌ្ឍន៍ធនធានមនុស្ស ដូចមានចែងនៅក្នុងផែនការយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដើម្បីធ្វើឲ្យសេដ្ឋកិច្ចសង្គមមានការរីកចម្រើន និងប្រកបដោយ ប្រសិទ្ធភាពការងារខ្ពស់ ប្រទេសកម្ពុជាបាននិងកំពុងយកចិត្តទុកដាក់លើការកែទម្រង់វិស័យអប់រំ និងបណ្ដុះបណ្ដាល ដោយបានពង្រឹងភាពជាដៃគូជាមួយវិស័យឯកជន និងសាធារណៈ សំដៅចូលរួមកសាងធនធានមនុស្ស ។ ជាមួយគ្នានេះដែរ ក្រសួងបានកសាងគោលនយោបាយអប់រំ និងផែនការយុទ្ធសាស្ត្រវិស័យអប់រំ សំដៅ ធានាបានដល់ការលើកកំពស់ប្រសិទ្ធភាព គុណភាពអប់រំ និងការកសាងសមត្ថភាពស្ថាប័នឲ្យកាន់តែរឹងមាំ ។ ដូចនេះ ជំនួយឧបត្ថម្ភរបស់រដ្ឋាភិបាល និងប្រជាជនជប៉ុន គឺជាជំនួយសប្បុរសដ៏ធំធេងក្នុងការចូលរួមចំណែក អភិវឌ្ឍន៍ធនធានអប់រំកម្ពុជាប្រកបដោយគុណភាពខ្ពស់ ។ យើងទទួលស្គាល់ថា ការចូលរួមលើកកម្ពស់ក្នុងភាពជាដៃគូ និងចំណងសាមគ្គីភាពរវាងប្រទេសយើង ទាំងពីរ កម្ពុជា-ជប៉ុន បានផ្ដល់នូវសក្ដានុពលដ៏ថ្លៃថ្លាសម្រាប់កម្ពុជា ហើយខ្ញុំសូមសម្ដែងនូវការដឹងគុណ ចំពោះ កាយវិការប្រកបដោយការគាំទ្រ និងជំនួយឧបត្ថម្ភរបស់រដ្ឋាភិបាល និងប្រជាជនជប៉ុនដែលបានចូលរួមកសាង ប្រទេសកម្ពុជាឡើងវិញ ដោយធានាបានដល់ការធ្វើឲ្យប្រសើរនូវហេដ្ឋារចនាសម្ព័ន្ធសង្គម សេដ្ឋកិច្ច អភិបាល-កិច្ចល្អ និងសេវាអប់រំ ។ ជាទីបញ្ចប់ខ្ញុំសូមថ្លែងអំណរគុណចំពោះ ឯកឧត្ដម Masaharu NAKAGAWA រដ្ឋមន្ត្រីក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យា និងគណៈប្រតិភូ ដែលបានបន្តយកចិត្តទុកដាក់ និងជួយគាំទ្រ ដល់ប្រទេសកម្ពុជា ក្នុងការសម្រេចបានផែនការអភិវឌ្ឍន៍ជាតិ ការអប់រំសម្រាប់ទាំងអស់គ្នា និងគោលដៅ អភិវឌ្ឍន៍សហស្សវត្ស នាពេលខាងមុខ ។ សម្រាប់អនាគតដ៏ភ្លឺស្វាងរបស់មនុស្សជំនាន់ក្រោយ ខ្ញុំសូមអញ្ជើញឯកឧត្ដម លោកជំទាវ លោក លោកស្រី ទាំងអស់ លើកកែវឡើង ។ សូមអរគុណ ។ |
