| ពិធីសម្ពោធជានិមិត្តរូបដាក់ឲ្យដំណើរការអគារធនធានចំនួន ២៦ ដែលជាហិរញ្ញប្បទានធនាគារអភិវឌ្ឍន៍អាស៊ី |
នៅវិទ្យាល័យទេពប្រណម្យ ខេត្តកណ្ដាល នាព្រឹកថ្ងៃទី២២ ខែមិថុនា ឆ្នាំ២០១២ ក្រសួងអប់រំ យុវជន និងកីឡា បានរៀបចំពិធីសម្ពោធជានិមិត្តរូបដាក់ឲ្យដំណើរការអគារធនធានចំនួន ២៦ ដែលជាហិរញ្ញប្បទានធនាគារអភិវឌ្ឍន៍អាស៊ី (ADB)ក្រោមអធិបតីភាពឯកឧត្តម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា ឯកឧត្ដមអភិបាលនៃគណៈអភិបាលខេត្តកណ្ដាល តំណាងធនាគារអភិវឌ្ឍអាស៊ីប្រចាំនៅកម្ពុជា និងមានការអញ្ជើញចូលរួមពី ឯកឧត្ដម លោកជំទាវ មន្ត្រីអប់រំ យុវជន និងកីឡាគ្រប់លំដាប់ថ្នាក់ ប្រតិភូអប់រំ យុវជន និង កីឡារាជធានី-ខេត្ត អាជ្ញាធរដែនដី ដៃគូអភិវឌ្ឍន៍ តំណាងសហគមន៍ លោកគ្រូ-អ្នកគ្រូ និងសិស្សានុសិស្សសរុបចំនួន ២ ១៥០នាក់ ។
ការសាងសង់អគារធនធានទាំងនេះ គឺដើម្បីឆ្លើយតបទៅនឹងយុទ្ធសាស្ត្ររបស់ក្រសួងអប់រំ យុវជន និងកីឡា ដែលបានដាក់ចេញនូវផែនការយុទ្ធសាស្ត្រវិស័យអប់រំឆ្នាំ ២០០៩-២០១៣ ដោយផ្ដោតលើគោលនយោបាយគន្លឹះសំខាន់ៗរួមមាន ៖ ការធានាលទ្ធភាពទទួលបានសេវាអប់រំប្រកបដោយសមធម៌ ការលើកកម្ពស់គុណភាព និងប្រសិទ្ធភាពនៃការអប់រំ និងការអភិវឌ្ឍស្ថាប័ន ការអភិវឌ្ឍសមត្ថភាពមន្រ្តីអប់រំសម្រាប់ធ្វើវិមជ្ឈការ។ អគារធនធាននីមួយៗ មានបន្ទប់កំព្យូទ័រចំនួន ២ បន្ទប់ពិសោធន៍វិទ្យាសាស្រ្តចំនួន ២ សាលប្រជុំ បណ្ណាល័យ និងបន្ទប់ការិយាល័យ ព្រមទាំងមានបំពាក់គ្រឿងសង្ហារឹម និងសម្ភាររូបវ័ន្តគ្រប់គ្រាន់សម្រាប់បម្រើឲ្យការបង្រៀន និងរៀន លើផ្នែកសកម្មភាពប្រតិបត្តិសិក្សាស្រាវជ្រាវរបស់គ្រូបង្រៀន និងសិស្សានុសិស្សទាំងនៅក្នុងអគារធនធាន វិទ្យាល័យ និងមកពីគ្រឹះស្ថានមធ្យមសិក្សាបណ្ដាញផងដែរ។
សាលាមធ្យមសិក្សាធនធានមានសារៈសំខាន់ក្នុងការលើកកម្ពស់គុណភាព និងប្រសិទ្ធភាពអប់រំ ដែលសិស្សានុសិស្សទទួលបានសេវាអប់រំប្រកបដោយគុណភាព បុគ្គលិកអប់រំទទួលបានសមត្ថភាពវិជ្ជាជីវៈ បង្កើនទេពកោសល្យក្នុងការដឹនាំ និងគ្រប់គ្រងការបង្រៀន ការសិក្សាស្រាវជ្រាវ មាតាបិតាសិស្សមានមោទនភាពចំពោះលទ្ធផលសិក្សាល្អប្រសើររបស់កូនចៅ សហគមន៍មានឱកាសទទួលបានប្រភពធនធានមនុស្សប្រកបដោយសមត្ថភាព សាលារៀនបណ្តាញមានឱកាសរួមការងារតាមបែបសហប្រតិបត្តិការផ្លាស់ប្ដូរបទពិសោធន៍លើអភិបាលកិច្ច គ្រប់គ្រងការងារបង្រៀន រៀន និងការអភិវឌ្ឍសមត្ថភាព។ បច្ចុប្បន្ន ក្រសួងអប់រំ យុវជន និងកីឡាបានកសាងអគារធនធានចំនួន ២៦ អស់ទឹកប្រាក់ចំនួន ៩.៣៩៨.៨៤៤,៧៦ ដុល្លាសហរដ្ឋអាមេរិក (ប្រាំបួនលាន បីរយកៅសិបប្រាំបីពាន់ ប្រាំបីរយសែសិបបួន និងចិតសិបប្រាំមួយសេនដុល្លាសហរដ្ឋអាមេរិក) ហើយបានដាក់ឲ្យដំណើរការនៅតាមវិទ្យាល័យនានាក្នុងរាជធានី-ខេត្តចំនួន ២៣ ។
|
