|
អគារមធ្យមសិក្សាធនធាន (អ.ម.ធ) ៖
អគារមធ្យមសិក្សាធនធានចំនួន ១៨ ត្រូវបានសាងសង់ក្រោមគម្រោងអភិវឌ្ឍន៍វិស័យអប់រំទីពីរ (ESDP II) ដែលត្រូវបានគាំទ្រផងដែរពីធនាគារអភិវឌ្ឍន៍អាស៊ី។ អ.ម.ធ ទាំងនេះបាននិងកំពុងដំណើរការតាំងពីដើមឆ្នាំ ២០១១។
ក្រោមគម្រោងលើកកម្ពស់គុណភាពអប់រំ អ.ម.ធ ចំនួនប្រាំបី ត្រូវបានសាងសង់រួចហើយ អ.ម.ធ ចំនួនបួនបាននិងកំពុងសាងសង់ និង អ.ម.ធ ចំនួនប្រាំមួយនឹងត្រូវបានសាងសង់មុនដំណាច់ឆ្នាំ ២០១៣។ ជាសរុប អ.ម.ធ ចំនួន ១៨ ត្រូវបានសាងសង់ក្រោមគម្រោងលើកកម្ពស់គុណភាពអប់រំ។ ដូច្នេះ អ.ម.ធ នឹងមានចំនួនសរុប ៣៦។ សាលាមធ្យមសិក្សានីមួយៗមានសាលាមធ្យមសិក្សាបណ្តាញរហូតដល់ប្រាំបី ដែលនឹងចែករំលែកប្រើប្រាស់ធនធានជាមួយសាលាមធ្យមសិក្សាធនធាន។
តួនាទីនិងភារកិច្ចរបស់អគារមធ្យមសិក្សាធនធាន
សេចក្តីណែនាំរបស់ក្រសួង អ.យ.ក លេខ ០៦ អយក.សណន ចុះថ្ងសទី ១៤ ខែ មករា ឆ្នាំ ២០១០ ស្តីពីតួនាទីនិងការទទួលខុសត្រូវរបស់សាលាមធ្យមសិក្សាធនធាន (ស.ម.ធ) និង បណ្តាញ ចែងថា ស.ម.ធ មានភារកិច្ចដូចខាងក្រោមៈ
- នាំមុខសាលារៀនដទៃក្នុងការអនុវត្តគោលនយោបាយ គោលការណ៍ កម្មវិធីសិក្សា គោល និងលិខិតបទដ្ឋាននានារបស់ក្រសួងអប់រំ យុវជន និងកីឡា។
- ពង្រឹងភាពជាអ្នកដឹកនាំ និងអភិបាលកិច្ចល្អលើការងារគ្រប់គ្រងប្រើប្រាស់ធនធាន (មនុស្ស សម្ភារ ថវិកា) របស់សាលារៀន ដោយបើកទូលាយឲ្យសាលាបណ្តាញមានឱកាសធ្វើសកម្មភាពប្រតិបត្តិ ចែករំលែកពីគ្នានូវបទពិសោធន៍នៃការអភិវឌ្ឍធនធានមនុស្ស ធនធានសម្ភារ និងផ្នែកស្មារតី សំដៅពង្រឹងបានគុណភាពនិងប្រសិទ្ធភាព អប់រំ។
- អភិវឌ្ឍវិជ្ជាជីវៈគ្រូបង្រៀនទាំងផ្នែកចំណេះដឹង ផ្នែកជំនាញបច្ចេកទេស និងផ្នែកចិត្ត-គរុកោសល្យឲ្យដល់កម្រិតស្តង់ដារគ្រូក្នុងតំបន់ ឬអន្តរជាតិ ទាំងនៅសាលាមធ្យមសិក្សាធនធាន និងសាលាបណ្តាញ (ជាពិសេស ភាសាអង់គ្លេស វិទ្យាសាស្ត្រ ICT សមត្ថភាពអនុវត្តកម្មវិធីសិក្សាគោលថ្មី និងសមត្ថភាពសិក្សាស្រាវជ្រាវបន្ថែម ឬ ស្វ័យវិក្រឹតការ។
- ពង្រឹងសមត្ថភាពវាយតម្លៃសមិទ្ធផលសិក្សារបស់សិស្សដោយសាលារៀន សមត្ថភាពស្វ័យវាយតម្លៃសាលារៀន ដើម្បីប្រែក្លាយសាលារៀនឲ្យទៅជាមណ្ឌលឧត្តមភាពនៃការបង្រៀន-រៀន ការប្រតិបត្តិអប់រំជាគំរូនៃលទ្ធផលសិក្សា គោលការណ៍សាលារៀនមានប្រសិទ្ធភាព និងសាលាកុមារមេត្រី អាចផ្សព្វផ្សាយបន្តទៅសាលារៀនដទៃទៀត។
- ពង្រឹងការអនុវត្តក្រមសីលធម៌វិជ្ជាជីវៈគ្រូបង្រៀន សំដៅឲ្យគ្រូបង្រៀនទាំងអស់ មានឥរិយាបថ អាកប្បកិរិយាវិជ្ជមាន មានមនសិការវិជ្ជាជីវៈខ្ពស់ មានសីលធម៌ល្អ សក្តិសមជាមាតាទីពីរពិតប្រាកដរបស់សិស្ស ហើយទទួលបាននូវការគោរពស្រឡាញ់ពីមជ្ឈដ្ឋានសហគមន៍ មាតាបិតា ឬអ្នកអាណាព្យាបាលសិស្ស និងសិស្សានុសិស្ស។
- បង្កលក្ខណៈឲ្យសិស្សបានបន្តការសិក្សាប្រកបដោយសមធម៌ តាមរយៈការផ្តល់អាហារូបករណ៍ដល់សិស្សក្រីក្រ និងសិស្សក្រីក្រដែលរៀនពូកែ ជាពិសេស ត្រូវយកចិត្តទុកដាក់ចំពោះសិស្សកំព្រា សិស្សពិការ សិស្សជនជាតិដើមភាគតិច សិស្សនារី សិស្សស្ថិតក្នុងគ្រួសារមានវិបត្តិ។
- ពង្រឹងការចូលរួមអភិវឌ្ឍន៍វិស័យអប់រំ និងគ្រប់គ្រងរាល់សកម្មភាពក្នុងនិងក្រៅសាលារៀនរបស់សិស្សពីសំណាក់សហគមន៍ មាតាបិតា ឬ អ្នកអាណាព្យាបាលសិស្ស សំដៅអនុវត្តការងារមានតម្លាភាព និង សុពលភាព។
- ធ្វើសហប្រតិបត្តិការជាមួយអង្គការជាតិ អន្តរជាតិ អង្គការក្រៅរដ្ឋាភិបាល ស្ថាប័ននានា និងសហគមន៍ ក្នុងគោលបំណងធានានិរន្តរភាពរបស់ "ស.ម.ធ" និងធ្វើឲ្យកាន់តែល្អប្រសើរនូវការសិក្សា ការបង្រៀន និងការស្រាវជ្រាវ។
- ផ្តល់ឱកាសឲ្យសហគមន៍ចូលរួម សហការ ទទួលខុសត្រូវ និងគ្រប់គ្រងប្រើប្រាស់ថវិកា កសាងផែនការអភិវឌ្ឍន៍សាលារៀន ការអនុវត្តផែនការអភិវឌ្ឍន៍សាលារៀន និងការអនុវត្តយុទ្ធសាស្ត្រវិស័យអប់រំ។
សម្រាប់ព័ត៌មានបន្ថែម សូមទាញយកឯកសារខាងក្រោម ៖
 ខិត្តប័ណ្ណព័ត៌មានអំពីអគារសិក្សាធនធាន (281.71 kB)
|
