|
មតិសំណេះសំណាល ណែនាំ និងផ្ដាំផ្ញើរបស់
ឯកឧត្ដម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា
ក្នុងពិធីប្រគល់សម្ភារបរិក្ខារបង្រៀននិងរៀនវិទ្យាសាស្ត្រដល់វិទ្យាល័យទូទាំងប្រទេស
ថ្ងៃទី ២៦ ខែ មករា ឆ្នាំ ២០១២
វិទ្យាស្ថានជាតិអប់រំ
សូមគោរព
ឯកឧត្ដមរដ្ឋលេខាធិការ អនុរដ្ឋលេខាធិការ អគ្គនាយកក្រសួងអប់រំ យុវជន និងកីឡា
ឯកឧត្ដម Putu Kamar yana នាយក ស្ថានតំណាង ធនាគារអភិវឌ្ឍន៍អាស៊ីប្រចាំកម្ពុជា
លោក-លោកស្រី នាយក នាយិកា លោកគ្រូ អ្នកគ្រូ និងក្មួយៗសិស្សានុសិស្សទាំងអស់ដែលមានវត្តមានក្នុងពិធីប្រគល់សម្ភារបរិក្ខារបង្រៀននិងរៀនវិទ្យាសាស្ត្រដល់វិទ្យាល័យទូទាំងប្រទេសដ៏អធឹកអធមនេះ ។
ជាបឋមក្នុងនាមថ្នាក់ដឹកនាំក្រសួងអប់រំ យុវជននិងកីឡា និងក្នុងនាមខ្ញុំផ្ទាល់ ខ្ញុំសូមសំដែងនូវការរីករាយជា ពន្លឹក ដែលបានចូលរួមជាមួយឯកឧត្ដម លោកជំទាវ លោក លោកស្រី និងក្មួយៗសិស្សានុសិស្សទាំងអស់ក្នុងពិធីប្រគល់សម្ភារបរិក្ខារបង្រៀននិងរៀនវិទ្យាសាស្ត្រជូនដល់វិទ្យាល័យទូទាំងប្រទេស ក្នុងក្របខណ្ឌគម្រោងលើកកម្ពស់គុណភាពអប់រំ ឬហៅថា (EEQP: Enhancing Education Quality Project) ។
គម្រោងលើកកម្ពស់គុណភាពអប់រំ EEQP ជាប្រភេទហិរញ្ញប្បទានឥតសំណង ផ្ដល់ដោយធនាគារអភិវឌ្ឍន៍អាស៊ី (ADB) ជូនដល់រាជរដ្ឋាភិបាលកម្ពុជា ។ ឆ្លៀតក្នុងឧកាសដ៏ថ្លៃថ្លានេះ ខ្ញុំសូមថ្លែងអំណរគុណដ៏ជ្រាលជ្រៅចំពោះធនាគារអភិវឌ្ឍន៍អាស៊ី ADB ដែលបានផ្ដល់ហិរញ្ញប្បទានឥតសំណង ដ៏សប្បុរសធម៌នេះដើម្បីរួមចំណែកលើកកម្ពស់គុណភាពនិងប្រសិទ្ធភាពការងារអប់រំនៅប្រទេសកម្ពុជា ។ ជាពិសេសទៅទៀត វត្តមានឯកឧត្ដម Putu Kamar Yana នាយកស្ថានតំណាងធនាគារអភិវឌ្ឍន៍អាស៊ី ប្រចាំប្រទេសកម្ពុជា ដែលចូលរួមជាកិត្តិយសក្នុងពេលនេះ គឺពិតជាការលើកទឹកចិត្តដល់មន្ត្រីអប់រំរបស់យើងខ្ញុំខ្លាំងណាស់ADB បានគាំទ្រគម្រោងលើកកម្ពស់គុណភាពអប់រំ (EEQP) តាមរយៈការផ្ដល់ហិរញ្ញប្បទានឥតសំណងចំនួន ២៧.១ លានដុល្លារសហរដ្ឋអាមេរិក ដោយមានមូលអប្បដិភាគរបស់រាជរដ្ឋាភិបាលចំនួន ៦.២៨ លានដុល្លារ សហរដ្ឋអាមេរិកសម្រាប់អនុវត្តរយៈពេល ៦ ឆ្នាំខ្ញុំសូមជម្រាបជូនថា ហិរញ្ញប្បទានឥតសំណងសម្រាប់គម្រោង EEQP នេះ ពិតជាមានសារៈសំខាន់និងចាំបាច់ណាស់ ហើយឆ្លើយតបនឹងគោលនយោបាយរបស់ក្រសួង ដែលបានលើកក្នុងផែនការយុទ្ធសាស្ត្រវិស័យអប់រំឆ្នាំ ២០០៩-២០១៣ ពោលគឺ គោលនយោបាយទី ២ ស្ដីពី «ការលើកកម្ពស់គុណភាពនិងប្រសិទ្ធភាពសេវាអប់រំ»។
ពេលនិយាយដល់គុណភាពនិងប្រសិទ្ធភាពអប់រំ ចាំបាច់ត្រូវពិនិត្យមើលអំពីធនធានដាក់បញ្ចូលទៅក្នុងវិស័យអប់រំដូចជា៖ ចំណែកថវិកាអប់រំ - ចំនួនគ្រូបង្រៀន - ចំនួនអាគារសិក្សា - សង្ហារិម - សៀវភៅសិក្សា - កម្មវិធីសិក្សា - ម៉ោងសិក្សា និងសម្ភារបរិក្ខារបម្រើឲ្យការបង្រៀននិងរៀន ជាដើម ។ ហេតុនេះហើយ ទើបគម្រោង EEQP រៀបចំឡើង ដោយផ្ដោតអាទិភាពលើការផ្ដល់សម្ភារបរិក្ខារបង្រៀននិងរៀនវិទ្យាសាស្ត្រ ជូនដល់វិទ្យាល័យទាំងអស់នៅទូទាំងប្រទេស ។
ផ្អែកតាមតួលេខស្ថិតិ ឆ្នាំ ២០០៩-២០១០ វិទ្យាល័យសរុបមានចំនួន ៣៨៣ - (អាគារធនធាន ១៨ គម្រោង ESDP 2)- អាគារធនធាន ១៨ EEQP = ៣៤៧) ។ ដូច្នេះ វិទ្យាល័យចំនួន ៣៤៧ នឹងទទួលបានសម្ភារបរិក្ខារបង្រៀននិងរៀនវិទ្យាសាស្ត្រពីគម្រោងលើកកម្ពស់គុណភាពអប់រំ (EEQP) ។
ការផ្តល់សម្ភារបរិក្ខារបង្រៀននិងរៀនវិទ្យាសាស្ត្រដល់វិទ្យាល័យនេះ ពិតជាអាចជួយបង្កើនការយល់ដឹងរបស់សិស្សបានល្អប្រសើរជាងមុន ។ លោកគ្រូ អ្នកគ្រូអាចបង្ហាញសម្ភារបរិក្ខារបង្រៀននិងរៀនវិទ្យាសាស្ត្រដល់សិស្សានុសិស្ស និងណែនាំប្រើប្រាស់បាន ដោយងាយស្រួលនិងឆាប់យល់ ។
ខ្ញុំបានទទួលរបាយការណ៍ថា ក្នុងក្របខណ្ឌគម្រោង EEQP នាយកដ្ឋានមធ្យមសិក្សាចំណេះទូទៅ បានសហការជាមួយវិទ្យាស្ថានជាតិអប់រំ ចុះបើកវគ្គបំប៉ននៅនឹងកន្លែងដល់គ្រូទទួលបន្ទុកបន្ទប់ពិសោធន៍ និងប្រធានក្រុមបច្ចេកទេសវិទ្យាសាស្ត្រនៅតាមវិទ្យាល័យធនធានចំនួន ១៨ ដែលសាងសង់ដោយគម្រោង ESDPII រួចហើយ និងគ្រោងបន្តការបំប៉ននេះដល់វិទ្យាល័យធនធានថ្មីចំនួន ៨ ទៀត ដែលសាងសង់ដោយគម្រោង EEQP ក្រោយពេលការបំពាក់សម្ភារបរិក្ខារពិសោធន៍រួចរាល់នាពេលឆាប់ៗខាងមុខនេះ។
ជាមួយនោះដែរក្នុងក្របខណ្ឌគម្រោង EEQP ដែរនាយកដ្ឋានបណ្ដុះបណ្ដាលសហការជាមួយវិទ្យាស្ថានជាតិអប់រំ ផលិតបាន Video Clip ណែនាំអំពីការពិសោធន៍វិទ្យាសាស្ត្របាន ២០ ទៅ ៣០ Clip រួចហើយ ដោយរៀបចំជា DVD ដើម្បីផ្សព្វផ្សាយដល់សាលារៀន ។ នេះជាមធ្យោបាយផ្ទេរចំណេះដឹងមួយដ៏ល្អ និងងាយស្រួលមួយ ដែលមិនមានការបញ្ជូនគ្រូឧទ្ទេសពីក្រសួងទៅតាមរាជធានី ខេត្ត និងមិនមានការបញ្ជូនសិក្ខាកាមពីកន្លែងមួយទៅកន្លែងមួយទៀតដែលនាំឲ្យចំណាយថវិកាច្រើន។យើងអាចប្រមូលផ្ដុំគ្រូ នៅតាមវិទ្យាល័យធនធានដែលមានសាលប្រជុំបំពាក់ទូរទស្សន៍ និងម៉ាស៊ីនចាក់ DVD ដើម្បីផ្លាស់ប្ដូរបទពិសោធន៍ និងចំណេះដឹងផ្សេងៗ។
ជាចុងក្រោយខ្ញុំសូមកោតសរសើរដល់ក្រុមការងារ និងថ្នាក់ដឹកនាំគម្រោង EEQP ដែលកន្លងមកបានខិតខំបំពេញការងារ ហើយសម្រេចបានលទ្ធផលល្អ តាមការរំពឹងទុករបស់គម្រោង ខ្ញុំសូមស្នើលោក លោកស្រីប្រធានមន្ទីរអប់រំ ជួយពិនិត្យតាមដាន និងណែនាំអំពីការប្រើប្រាស់សម្ភារបរិក្ខារ ដែលទទួលបាននេះ ក្នុងស្មារតីទទួលខុសត្រូវខ្ពស់ ។ ជាពិសេស លោកនាយក នាយិកាវិទ្យាល័យ ដែលបានទទួលសម្ភារបរិក្ខារបង្រៀននិងរៀនវិទ្យាសាស្ត្ររួចហើយ ត្រូវចាត់តាំងអ្នកគ្រប់គ្រង ថែរក្សា ថែទាំ ឱ្យបានល្អ និងណែនាំឱ្យគ្រូប្រើប្រាស់សម្ភារបរិក្ខារទាំងនេះឱ្យអស់លទ្ធភាព ។
នាយកដ្ឋានមធ្យមសិក្សាចំណេះទូទៅ វិទ្យាស្ថានជាតិអប់រំ ពិសេសមន្ត្រី EEQP ត្រូវចុះពិនិត្យតាមដានសកម្មភាពតាមវិទ្យាល័យ និងតាមអគារធនធាន ដើម្បីជួយបំពេញបន្ថែមត្រង់ចំណុចណា ដែលលោកគ្រូ អ្នកគ្រូនៅទីនោះមិនទាន់អនុវត្តបាន ។ ត្រូវជំរុញដំណេរការផ្សព្វផ្សាយ Video Clip ស្ដីពីការណែនាំពិសោធន៍វិទ្យាសាស្ត្រដល់គ្រប់ គ្រឹះស្ថានមធ្យមសិក្សាទូទាំងប្រទេស និងមជ្ឈមណ្ឌលគរុកោសល្យភូមិភាគ ។
ជាទីបញ្ចប់ខ្ញុំសូមជូនពុទ្ធពរទាំងបួនប្រការ អាយុ វណ្ណៈ សុខ ពល កុំបីឃ្លៀងឃ្លាតឡើយ ។
សូមអរគុណ
|
