| ពិធីចុះហត្ថលេខាលើអនុស្សរណៈយោគយល់ស្ដីពី គម្រោងលើកកម្ពស់ការធានាគុណភាពអប់រំនៅកម្ពុជា |
ឆ្លើយតបទៅនឹងការអញ្ជើញរបស់រដ្ឋាភិបាលស៊ុយអែត គណៈប្រតិភូដឹកនាំដោយឯកឧត្ដម អ៊ឹម សិទ្ធី រដ្ឋមន្ត្រីក្រសួងអប់រំយុវជន និងកីឡា បានអញ្ជើញទៅចូលរួមសន្និសីទអប់រំអន្តរជាតិ “ The Stockholm Summit “ ចាប់ពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០១២ នៅទីក្រុង Stockholm ប្រទេសស៊ុយអែត។ ក្នុងឱកាសនៃកិច្ចប្រជុំនេះ នាព្រឹកថ្ងៃទី២៨ ខែឧសភា ឆ្នាំ២០១២ នៅសណ្ឋាគារ Hilton ទីក្រុង Stockholm មានរៀបចំពិធីចុះហត្ថលេខាលើអនុស្សរណៈយោគយល់ស្ដីពី គម្រោងលើកកម្ពស់ការធានាគុណភាពអប់រំនៅកម្ពុជា រវាងអធិការដ្ឋានសិក្សានៃប្រទេសស៊ុយអែត ដោយលោកជំទាវ Ann-Marie Begler អគ្គនាយកនៃអធិការដ្ឋានសិក្សានៃប្រទេសស៊ុយអែត និងក្រសួងអប់រំ យុវជន និងកីឡានៃព្រះរាជាណាចក្រកម្ពុជា ដោយឯកឧត្ដម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា។
ភាគីអធិការដ្ឋានសិក្សានៃប្រទេសស៊ុយអែត បានផ្ដល់ជំនួយសហប្រតិបត្តិការលើគម្រោងកម្មវិធីលើកកម្ពស់ការធានាគុណភាពអប់រំនៅកម្ពុជា ដោយផ្ដោតសំខាន់ទៅលើសកម្មភាពជាអាទិភាពចំនួន ៤ គឺ ៖ ១-កំណត់ក្របខណ្ឌការងារធានាគុណភាពអប់រំ ២-កសាងឧបករណ៍ការធានាគុណភាពអប់រំ ៣-ធានាគុណភាពអប់រំ តាមរយៈប្រព័ន្ធគ្រប់គ្រងអប់រំ ៤-អភិវឌ្ឍសមត្ថភាពដើម្បីធានាគុណភាពអប់រំ
គម្រោងកិច្ចសហប្រតិបត្តិការលើកកម្ពស់ធានាគុណភាពអប់រំនៅកម្ពុជានេះ មានរយៈពេលបីឆ្នាំ គឺចាប់អនុវត្តពីខែតុលា ឆ្នាំ២០១២ រហូតដល់ខែធ្នូ ឆ្នាំ២០១៥។
ធ្វើនៅទីក្រុង Stockholm ថ្ងៃទី២៨ ខែឧសភា ឆ្នាំ២០១២ |
