| ឯកឧត្ដម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា បានដឹកនាំគណៈប្រតិភូចុះពិនិត្យស្ថានភាពសាលារៀនបណ្ដែតទឹក នៅស្រុកបរិបូណ៌ ខេត្តកំពង់ឆ្នាំង |
នាឱកាសនៃការចុះបំពេញការងារលើការពង្រឹងវិស័យអប់រំ នៅខេត្តកំពង់ឆ្នាំង នាព្រឹកថ្ងៃទី១១ ខែមិថុនា ឆ្នាំ២០១២នេះ ឯកឧត្ដម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា និងប្រតិភូអមដំណើរ បានអញ្ជើញចុះពិនិត្យមើលស្ថានភាពសាលារៀនបណ្ដែតទឹកស្ថិតនៅតាមបឹងទន្លេសាបចំនួនពីរ គឺសាលាបឋមសិក្សាយុគន្ធរ ស្ថិតនៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង និងសាលាបឋមសិក្សាសេះស្លាប់ ស្ថិតនៅឃុំសេះស្លាប់ ស្រុកបរិបូណ៌ ខេត្តកំពង់ឆ្នាំង ព្រមទាំងជួបសំណេះសំណាលជាមួយលោកគ្រូ-អ្នកគ្រូ និងសិស្សានុសិស្សតំណាងសហគមន៍និងមាតាបិតាសិស្ស ។
ក្នុងពិធីសំណេះសំណាល ឯកឧត្ដមរដ្ឋមន្ត្រីបានសំដែងនូវមនោសញ្ចេតនានឹករលឹក និងអរគុណចំពោះលោកគ្រូ-អ្នកគ្រូអាណាព្យាបាលសិស្ស អាជ្ញាធរដែនដី និងមន្ត្រីអប់រំ យុវជន និងកីឡាគ្រប់លំដាប់ថ្នាក់នៃខេត្តកំពង់ឆ្នាំងដែលកំពុងបានចូលរួមយ៉ាងសកម្មក្នុងការអនុវត្តវិស័យអប់រំតាមរយៈការលើកកម្ពស់សមត្ថភាពក្នុងការបង្ហាត់បង្រៀន ការប្រមូលកុមារដល់អាយុសិក្សាឲ្យរៀនគ្រប់ៗគ្នាសំដៅឈានទៅសម្រេចគោលដៅនៃការអប់រំសម្រាប់ទាំងអស់គ្នាសកលកម្មអប់រំ ពិសេសបឋមសិក្សាឆ្នាំ២០១៥។ បច្ចុប្បន្ននេះ ប្រទេសកម្ពុជាមានសាលាចំណេះទូទៅចំនួន ៨.៤៧១សាលា ក្នុងនោះសាលារៀនបណ្ដែតទឹកមានចំនួន ៤២សាលា នៅខេត្តចំនួន ៤ ដែលស្ថិតនៅជុំវិញបឹងទន្លេសាប រួមមាន៖ ខេត្តកំពង់ឆ្នាំង កំពង់ធំ សៀមរាប និងបាត់ដំបង។ ដោយឡែកនៅខេត្តកំពង់ឆ្នាំង មានសាលារៀនបណ្ដែតទឹកចំនួន ១១ សាលា ក្នុងនោះសាលារៀនបឋមសិក្សាបណ្ដែតទឹកមានចំនួន ៨ សាលា ស្ថិតនៅក្នុងស្រុកចំនួន ២ គឺស្រុកបរិបូណ៌ និងស្រុកកំពង់លែង ដែលមានគ្រូបង្រៀនចំនួន ៣៣នាក់ ស្រី ៣នាក់ និងមានសិស្សសរុបចំនួន ១,៦១៥នាក់ ស្រី ៧៩០នាក់ និងអនុវិទ្យាល័យបណ្ដែតទឹកមានចំនួន ៣ ស្ថិតនៅក្នុងស្រុកចំនួន ២ គឺស្រុកបរិបូណ៌ និងស្រុកជលគីរី ដែលមានគ្រូបង្រៀនចំនួន ១៧នាក់ ស្រី ២នាក់ និងសិស្សមានចំនួន ៧៣៩នាក់ ស្រី ៤១១នាក់។
ឯកឧត្ដមរដ្ឋមន្ត្រី បានគូសបញ្ជាក់ថា កម្មវិធីកែលម្អសាលារៀនគឺជាចំណុចអាទិភាពមួយដែលក្រសួងអប់រំ យុវជន និងកីឡាបានកំពង់យកចិត្តទុកដាក់សំដៅលើកកម្ពស់គុណភាពអប់រំក្នុងការបង្រៀន និងរៀននៅគ្រប់កម្រិតសិក្សាឲ្យកាន់តែល្អប្រសើរដើម្បីឆ្លើយតបទៅនឹងគោលនយោបាយ និងយុទ្ធសាស្ត្រអភិវឌ្ឍន៍ជាតិ។ ឯកឧត្ដមរដ្ឋមន្ត្រី បានធ្វើការផ្ដាំផ្ញើដល់លោកគ្រូ-អ្នកគ្រូ និងមន្ត្រីអប់រំទាំងអស់ត្រូវចូលរួមអប់រំដល់កុមារឲ្យមានចំណេះដឹង បំណិន និងសីលធម៌ខ្ពស់ស្របតាមចតុស្តម្ភទាំង ៤ នៃគោលការណ៍អប់រំ គឺរៀនដើម្បីមានចំណេះដឹង រៀនដើម្បីមានចំណេះធ្វើ រៀនដើម្បីក្លាយជាពលរដ្ឋល្អ និងរៀនដើម្បីចេះរួមរស់នៅជាមួយគ្នា និងសូមឲ្យសិស្សានុសិស្សទាំងអស់ខិតខំយកចិត្តទុកដាក់ត្រងត្រាប់ស្ដាប់លោកគ្រូ-អ្នកគ្រូពន្យល់មេរៀននៅក្នុងថ្នាក់ ដើម្បីឲ្យក្លាយខ្លួនទៅជា កូនល្អ សិស្សល្អ មិត្តល្អ និងមានចំណេះដឹង។ |
