|
តបតាមការអញ្ជើញរបស់ក្រសួងអប់រំ យុវជន និងកីឡា នៃព្រះរាជាណាចក្រកម្ពុជា ឯកឧត្តម Masaharu NAKAGAWA រដ្ឋមន្រ្តីក្រសួងអប់រំ វប្បធម៌ កីឡា វិទ្យាសាស្រ្ត និងបច្ចេកវិទ្យា នៃប្រទេសជប៉ុន បានដឹកនាំគណៈប្រតិភូ មកទស្សនៈកិច្ចនៅព្រះរាជាណាចក្រកម្ពុជាចំនួនបីថ្ងៃ ចាប់ពីថ្ងៃទី ១០ ដល់ ១២ ខែ មករា ឆ្នាំ ២០១២។
គណៈប្រតិភូបានចូលជួបពិភាក្សាការងារជាមួយ ឯកឧត្តម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា នៅវេលា ម៉ោង ៣ រសៀល នាថ្ងៃទី ១១ ខែ មករា ឆ្នាំ ២០១២ នៅទីស្ដីការក្រសួងអប់រំ យុវជន និងកីឡា ដើម្បីផ្លាស់ប្ដូរបទពិសោធន៍ ការងារ ដែលជាសក្ខីភាពនៃកិច្ចសហប្រតិបត្តិការដ៏ជិតស្និត និងជាមិត្តភាព សាមគ្គីភាព និងការយោគយល់គ្នាទៅវិញទៅមក លើវិស័យអប់រំ វប្បធម៌ កីឡា វិទ្យាសាស្រ្ត និងបច្ចេកវិទ្យា រវាងប្រទេសជាតិទាំងពីរ កម្ពុជា-ជប៉ុន ឲ្យកាន់តែមានការរីកចម្រើនឡើងថែមទៀត ។
ក្នុងការស្នាក់នៅប្រទេសកម្ពុជា ឯកឧត្តម Masaharu NAKAGAWA រដ្ឋមន្ត្រីក្រសួងអប់រំ នៃប្រទេសជប៉ុន និងគណៈប្រតិភូ បានអញ្ជើញទៅទស្សនាប្រាសាទអង្គរវត្ត ប្រាសាទបាយ័ន និងទស្សនាគ្រឹះស្ថានសិក្សា និងរមណីយដ្ឋាន មួយចំនួនក្នុងរាជធានីភ្នំពេញ សំដៅលើកកំពស់តួនាទីវិស័យ អប់រំ-វប្បធ៌ម ឆ្ពោះទៅរកការអភិវឌ្ឍប្រកបដោយនិរន្តរភាព ។
ឯកឧត្តម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡាក៏បានថ្លែងអំណរគុណចំពោះ ឯកឧត្តម Masaharu NAKAGAWA រដ្ឋមន្រ្តីក្រសួងអប់រំ វប្បធម៌ កីឡា វិទ្យាសាស្រ្ត និងបច្ចេកវិទ្យា និងគណៈប្រតិភូ ដែលបានបន្តយកចិត្តទុកដាក់ និងជួយគាំទ្រដល់ប្រទេសកម្ពុជា ក្នុងការសម្រេចបានផែនការអភិវឌ្ឍន៍ជាតិ ការអប់រំសម្រាប់ទាំងអស់គ្នា និងគោលដៅ អភិវឌ្ឍន៍សហស្សវត្សនាពេលខាងមុខ ។
ធ្វើនៅរាជធានីភ្នំពេញ ថ្ងៃទី ១១ ខែ មករា ឆ្នាំ ២០១២
តំណ ៖ សុន្ទរកថាស្វាគមន៍របស់ ឯកឧត្តម អ៊ឹម សិទ្ធី រដ្ឋមន្រ្តីក្រសួងអប់រំ យុវជន និងកីឡា
|
