| ផែនការគោលបច្ចេកវិទ្យាព័ត៌មាន និងសារគមនាគមន៍ ក្នុងវិស័យអប់រំ |
ចក្ខុវិស័យរយៈពេលវែងរបស់ក្រសួងអប់រំ យុវជន និងកីឡា (អយក) គឺ "កសាង និងអភិវឌ្ឍធនធានមនុស្សប្រកបដោយគុណភាព និងគុណធម៌ប្រសើរបំផុតលើគ្រប់ផ្នែក ដើម្បីកសាងសង្គមកម្ពុជាឲ្យក្លាយជាសង្គមរីកចម្រើនផ្អែកលើចំណេះដឹង និងចំណេះធ្វើជាមូលដ្ឋាន" ។ ស្របតាមចក្ខុវិស័យផែនការយុទ្ធសាស្ត្រវិស័យអប់រំ ២០០៩-២០១៣ ក្រសួង អយក បានផ្ដួចផ្ដើមបញ្ចូលការប្រើប្រាស់បច្ចេកវិទ្យា ព័ត៌មាន និងសារគមនាគមន៍ (បពស) ឲ្យកាន់តែទូលំទូលាយ ។ ដើម្បីលើកកម្ពស់ប្រសិទ្ធភាពនៃការអប់រំសម្រាប់ទាំងអស់គ្នានៅគ្រប់កម្រិតសិក្សា និងដើម្បីកសាងកម្លាំងពលករប្រកបដោយសមត្ថភាពខាងបច្ចេកវិទ្យា និងសមត្ថភាពវិភាគពិចារណាជូនប្រទេសជាតិ ។ នៅឆ្នាំ ២០០៣ ក្រសួង អយក បានផ្ដើមដំណើរការកសាងគោលនយោបាយសំដៅកែលម្អគុណភាពអប់រំតាមរយៈការប្រើប្រាស់ បពស ។ នៅខែមករា ឆ្នាំ ២០០៥ ក្រសួងបានអនុម័តឲ្យប្រើប្រាស់ជាផ្លូវការឯកសារ "គោលនយោបាយ និងយុទ្ធសាស្ត្រប្រើប្រាស់បច្ចេកវិទ្យា ព័ត៌មាន និងសារគមនាគមន៍ក្នុងការអប់រំនៅកម្ពុជា" ។ ឯកសារគោលនយោបាយនេះ ត្រូវបានចាត់ទុកជាគោលនយោបាយជាតិសម្រាប់តម្រង់ទិសដៅការប្រើប្រាស់បច្ចេកវិទ្យាព័ត៌មាន និងសារគមនាគមន៍ក្នុងវិស័យអប់រំ ហើយឯកសារនេះ ក៏បានកំណត់នូវសកម្មភាពចម្បងៗដែលក្រសួង អយក ត្រូវបំពេញ ដើម្បីឲ្យការធ្វើសមាហរណកម្មបច្ចេកវិទ្យាទាំងនេះក្នុងការរៀន និងបង្រៀននៅគ្រប់អនុវិស័យអប់រំអាចសម្រេចទៅបានដោយជោគជ័យ ។ ក្រោមជំនួយបច្ចេកទេសរបស់អង្គការយូណេស្កូ កិច្ចការកសាងឯកសារ "ផែនការគោលស្ដីពីបច្ចេកវិទ្យា ព័ត៌មាន និងសារគមនាគមន៍ក្នុងវិស័យអប់រំ ២០០៩‑២០១៣" បានចាប់ផ្ដើមនៅឆ្នាំ ២០០៧ ដែលជាផ្នែកមួយនៃកម្មវិធីសាលារៀនបើកចំហ ដែលជាកម្មវិធីកើតចេញពីកិច្ចសហប្រតិបត្តិការដ៏មានមហិច្ឆតាមួយរវាង ក្រសួង អយក និងវិទ្យាស្ថានបើកទូលាយ ។ កម្មវិធីនេះសំដៅកសាងផែនការប្រើប្រាស់ បពស នាពេលអនាគតនៅក្នុងក្រសួង អយក ដោយចាប់ផ្ដើមពីការអភិវឌ្ឍកម្មវិធីសិក្សា ការបណ្ដុះបណ្ដាលគ្រូ និងការធ្វើវិក្រឹតការគ្រូបង្រៀន ការសិក្សាវិភាគពីតម្រូវការហេដ្ឋារចនាសម្ព័ន្ធ ការត្រៀមរៀបចំរចនាសម្ព័ន្ធ និងយន្តការដែលក្រសួងត្រូវការជាចាំបាច់ ការបណ្ដុះបណ្ដាលមន្ត្រីក្រសួង ការតភ្ជាប់បណ្ដាញ និងការអភិវឌ្ឍមាតិកាអប់រំសម្រាប់ការបង្រៀនទៅតាមសាលារៀន និងការបណ្ដុះបណ្ដាលគ្រូបង្រៀន ។ កម្មវិធីនេះ ក៏មានបញ្ចូលនូវការសិក្សាស្រាវជ្រាវពីបច្ចេកវិទ្យាដែលសក្ដិសមនឹងការប្រើប្រាស់នៅតាមថ្នាក់រៀននៅកម្ពុជា ដោយផ្ដោតការចាប់អារម្មណ៍ជាពិសេសទៅលើបច្ចេកវិទ្យាដែលប្រើប្រាស់ថាមពលអគ្គិសនីតិចតួច ដើម្បីឲ្យការប្រើប្រាស់មាននិរន្តរភាព ។
ទាញយកឯកសារ ឯកសារជាភាសាអង់គ្លេស ៖ ឯកសារជាភាសាខ្មែរ ៖ |
